من 3 أيام .. يوم 24-6-2010 ..

خلصت اخر امتحان في الكلية…

الحياة بشكلها اللي انا عارفاه  ومتعودة عليه .. خلصت ..

ويفترض  كل حاجة تختلف..

الطريق المحدد الممهد خلص.. وكل واحد هيختار سكته… بداية مختلفة تماما..

حاجات كتيرة حصلت ف الاربع سنين دول… ومش كلها حاجات حلوة طبعا..

شخصيا.. ما أقدرش أقول اني زعلانة انهم خلصوا..

وان كنت طلعت بحاحة واحدة من الكلية .. ف هيا الناس المحترمة الطيبة اللي عرفتها ..

واللي اتمنى ان يفضل بيني وبينهم اتصال على طول..

وعموما انا عندي شعور ان دفعتي كانت فعلا  دفعة مميزة ومحترمة ..

بالاضافة لكام شخص يتعدوا على الصوابع من اللي درسوني.. بس بجد كانوا محترمين و زوق .. وربنا يكرمهم ويوفقهم ف حياتهم ان شاء الله..

و3-4-5 مناهج من مجموع حوالي…  44 منهج عقيم ..  D:

يا رب يوفقنا كلنا ف المرحلة الجاية .. وكلنا ناخد القرارات الصح ف شغلنا وحياتنا ان شاء الله

بس خلاص .. سلام

للشاعر علي سلامة…لسه قارياها ف المصري اليوم النهاردة

مش عارفة في ايه بس هيا عاجباني جدا

كلمتين فى قلبى من زمان

خلينى أقولهم

وأقوم أنام

مين عارف

مش يمكن يكون ده آخر كلام

أبويا حلف

ما يخش بيتنا قرش حرام

وأمى صبرت وربت الأيتام

قالوا الحزن بيروح مع الأيام

لكن راحت أيام

وجت أيام

ولسه الحزن

خلينى افتش جوايا

واحسب اللى فاضل معايا

من أيامى الجميلة

فطيرة بالسكر

بقرش صاغ

وضحكة م القلب

أرمى روحى وسط الناس

ألاقى فى كل ركن حضن

يكفينى دفا

ميت سنة لقدام

مين عارف

مش جايز تكون دى الرحلة الأخيرة

ما بين ده أبوك

وأبوك مات.. مسافة مفيش

يا ترى بص ع الدنيا

وعرف إنها كدابة

ما تسويش

ولا الراجل مننا بينكسر

لما بتموت الأحلام

مين عارف

خلينى أبص تانى ع الطريق

اقف عند كلمة

ما عرفتش أفسرها

ماكنش عندى لعب وأنا صغير

لكن يوم كبرت

بقى عندى لعب كتير

كل ما زهقت من لعبة

أكسرها

هربت م الدوشة

لاقيت الدوشة جوايا

أسافر

تسافر معايا

وارمى قلبى تانى وسط الناس

لكن يتوه منى

حاجات كتير

راحت غصب عنى

وحاجات غيرتنى

وحاجات ما قدرتش أغيرها

أنا اللى عشت عمرى كله

فى بلاد العاشقين

أدينى رايح

زى ما ابتديت.. حزين

قوليلى إن قلبك مسامحنى

وراضى عنى ليوم الدين

رايح ومفيش معايا زاد

لا بيت

ولا ولاد

مسنود بس على رحمة رب العالمين

ومفيش شىء تانى غيرها

…

Don’t Seek Frustration With a Microscope

.

.

Just Be Happy While You Can

.

.

You Don’t Know What Comes Tomorrow

السلام عليكم

ازيكو جميعا

الاجازة جت..وقلت هوا دا الوقت المناسب علشان اغير ثيم البلوج

هوا اينعم الثيم الجديد عنوان البلوج فيه صغير و ف جنب زي ما يكون رقم موبايل

بس انا عاجبني الثيم

…

ممكن بقى اطلب منكم حاجة؟

بما ان احنا لسه فيها ومحدش فينا اتهور واتجوز او خلف مثلا

ممكن ان شاء الله اللي ربنا يرزقه بعيل…يبقى يربـيه؟ يا اما ما يجيبوش اصلا؟

معلش انا عارفة اللي بيقرا دلوقتي بيقول(نعم؟) او بيدحك او بيشتم

بس اصل انا اتخنقت بس من دلع العيال الصغيرة

انا بس عاوزة افهم…ليه البنات تفضل مكتئبة لحد ما تتجوز…وبعدين تفضل مكتئبة تاني لغاية ما تجيب عيال؟

والشباب يفضل يشتم ف البطالة واما يلاقي شغل يشتم ف الراتب القليل… واما ربنا يرزقه..امه تتخانق مع ام العروسة على القايمة والجزمة اللي ع العريس والشبكة اللي اخت العريس مستكتراها ع العروسة…الخ

ويوجعوا دماغنا ويحكولنا ف حواديت ليه؟

وهما بعد كل ده اما هيجيبوا عيال…مش هيربوهم؟

ازاي طفل يشتم ابوه و يزعق ف امه؟

الواحد كان زمان اما يطلب حاجة ويتقاله عليها لأ ويزن فيها او يفكر يزعق ويعيط زي العيال المدلعة

كان يسمع الشخطة المحترمة..مع التبريقة المتينة..يكن ويحترم نفسه

العيال دلوقتي لو اتقالها حاجة >>تزعق وتعيط >>اهلها تديها اللي هيا عاوزاه

نوع من ترييح الدماغ بالنسبة للاهل

والطفل عرف السكة خلاص

يعني ايه الولد مش بيعرف يالكل الا من أكل بره؟

اما مايلاقيش غير فاصوليا وهوا هيموت من الجوع …هياكل عادي يعني

يعني ايه طفل عنده  7-8 سنين يشرب كل يوم علبتين و تلاتة بيبسي وامه اللي بتديهاله؟

واما يبقى عنده 15 سنة يجيله سكر ان شاء الله…ويبقى ذنبه ف رقبة مين ده اصلا؟

يعني ايه طفله.. ابوها..ابوها اللي هوا راجل البيت مش عارف يقومها من قدام التلفزيون وسايبها  لحد الساعة3 بدل ما تقوم تنام كطفلة طبيعية الساعة 10 بالكتير؟

الاهل دلوقتي مش بيربو عيالهم… بيسيبوهم كده الحياة تعلمهم

…

ماهيا دي نوعية العيال اللي اما بتكبر وتتجوز

اهلهم بتصرف عليهم بردو وعلى عيالهم بعد كده

لان الواد مش حمل شغل وبهدله

والبت مش حمل عيال وقرف

على فكرة احنا واحنا صغيرين اضربنا واتهزءنا واتزعقلنا بجميع الاشكال

وده شيئ انا فخورة بيه وبحمد ربنا عليه

واهلنا (الاب والام مع بعض) كانوا بياخدو بالهم من تصرفاتنا..وينبهونا ع الغلط

مش تلاقي عيل…داخل على ضيوف ابوه الذين لا تقل اعمارهم عن 45-50 سنة وبيتناقش معاهم

وابوه مبسوط اوي بخفة دم اللي خلفوه وسايبه قاعد عادي يرغي

…

العيال بتاعة دلوقتي دي…كمان 15-20 سنة

هيبقوا جيل مش ههقولكو مفروض يشيل البلد

بس ع الاقل مفروض يشيل نفسه ويشيل اهله اللي تعبو علشانه

فلازم يكون متربي صح…وحاسس ان حد تعب علشانه

علشان كده بكرر رجائي…اللي ان شاء الله ربنا يرزقه بعيال

يبقى أد قراره ده..وأد المسؤولية دي ويربيهم صح

ربنا يوفقنا جميعا

PEACE BA2A

]]> http://emandarwish.wordpress.com/2010/02/07/el-waksa-1/feed/ 7 emanD http://emandarwish.wordpress.com/2009/12/18/162/ http://emandarwish.wordpress.com/2009/12/18/162/#comments Fri, 18 Dec 2009 18:30:30 +0000 emanD http://emandarwish.wordpress.com/?p=162 ]]> عزاء الانسان الوحيد

في اي لحظة يحس فيها انه

في النازل

.

.

.

.

ان الوضع كان ممكن يكون أسوء من كده بكتير

الحمد لله على كل حال

…

أخويا النهاردة..داخل علينا ..وف ايده ورقة بيقول ان واحد وزعها عليهم

وقالهم انه قراها وخاف ف راح مصورها ووزعها

الورقة فيها قصة…اكيد كلكو عارفينها او جاتلكو بالميل او ع الموبايل مثلا

بتاعة الشيخ احمد حامل مفاتيح المسجد النبوي.. اللي حلم بالرسول صلى الله عليه وسلم

والرسول قاله شوية حاجات من نوعية: النساء متبرجات..الاغنياء لا يزكون اموالهم

يوم القيامة قريب..سيظهر ف في السماء نجمة واضحة

كل ده لطيف…بس المشكلة ان اكتر من تلات اربع الرسالة  كالآتي

· في الاول: “اقرأها كاملة وإلا ستأثم”

· اذا قام احد من الناس بنشرها سيحظى بخير كثير واذا اهملها فقد اثم اثما كبيرا

· من لم ينشرها فانه يرمى (بضم الياء) من رحمة الله يوم القيامة

· من قام بنشر ثلاثين ورقة  يزيل الله عنه الهم والغم ويوسع عليه رزقه و يحل مشاكله في اربعين يوما (واخدين بالكو من موضوع المدة المحددة ده؟)

· قام احدهم بنشرها  فرزقه الله بخمس وعشرين الف من المال..(اه والله مكتوب كده.. “من المال”) وواحد تاني الف من المال…وواحد تالت زادت ارباحه 90 الف من المال برده

· و ان شخصا كذب الوصية فقد والده في نفس اليوم و هذه معلومة لاشك فيها واحد الاطباء اهملها فلقي مصرعه في نفس اليوم

· يرجى ارسال 25 نسخة وبشر المرسل اليه بما يحصل له في اليوم الرابع بعد 96 ساعة من نشرها (بالمعاد طبعا)

والرساله أطول من كده بكتير ومليئة بالاخطاء الاملائية والنحوية

ووصلت للطرد من رحمة الله اللي هوا اللعن ان شاء الله…عال والله

وبعدين مين أحمد ده؟!!

عشان كده الناس بتخاف و بتصورها وتوزعها ف الشارع

طبعا الرسالة مش جديدة..وانا متيألي اللي طلعها تاني الايام دي..الناس اللي كانت بتقول انها شافت العدرا (مريم العذراء يعني) ف حته كده ف مصر

و كان برنامج العاشرة مساءا بتكلم ف الموضوع ده امبارح

المشكلة مش انهم يشوفوا العدرا…المشكلة ان في ناس مسلمين اتصلوا واكدوا المضوع ده

يعني احنا عندنا ف ديننا الاسلامي في تجليات وكلام من ده

هوا احنا وصلنا لدرجة الجهل..والتأثر بالايحاء ان احنا مش عارفين هوا ايه اللي تبع عقيدتنا (اللي هيا اصل ديننا) من اللي دخيل عليها

احنا عندنا قرآن..وسنة..وعارفين علامات الساعة

وانا اعتقد ان اي حاجة تانية تبقى فتنة…مفروض نفضل واخدين بالنا من الخط اللي يفصلنا عن الوقوع فيها

خاصة النوع ده من الفتن..اللي يمس عقيدتنا..وممكن يلخبطلنا ثوابت كتير .. ونبقى مش عارفين الحقيقة من الخرافة

سلام

ده العنوان اللي للأسف عيني وقعت عليه وانا بفرد الجرنال عشان اكل عليه (حيث ان هيا دي الفايدة الوحيدة لجرنال الجمهورية ده)…

وده مقال في الجمهورية الاسبوعي بتاع الخميس اللي فات ف صفحة  15..

وحرصا مني على سلامتكم العقلية وسلامتكم من امراض الدم…فأنا هحط مقتطفات من المقال..وليس المقال كله..

اسمعوا…او اقروا يعني..

“الذين يتحدثون عن تراجع دور مصر العربي والاقليمي والدولي واهمين وخيالهم واسع ويسعون لارضاء غرورهم ويخفون سوء تقديرهم لما يحدث علي الساحة الخارجية وتنامي دور مصر علي جميع الأصعدة سواء العربية أو الاقليمية أو الدولية وأيضا تعاظم الدور المصري الرسمي والبرلماني.”

حسيتوا بحاجة؟!!

طب خدوا اللي بعدها…

“والذين يطلقون العنان لخيالهم المريض ويدعون زورا وبهتانا تراجع الدور المصري ويسعون لايهام الرأي العام انهم يحبون مصر ولكن مصر بريئة من هؤلاء وتصرفاتهم الحمقاء.
وغالبية الذين يتحدثون حديث الأفك عن تراجع دور مصر لم يشاركوا في أي منتدي أو مؤتمر عربي أو اقليمي أو دولي سواء علي مستوي الحكومات أو البرلمانات أو المنظمات الشعبية وياليت هؤلاء كانوا معنا في مقر الأمم المتحدة…الخ”

انهم كانوا ف مؤتمر يعني للبرلمانيين وكده..

“فالوفد البرلماني المصري والذي قاده باقتدار الدكتور أحمد فتحي سرور ومعه رموز العمل البرلماني تحت قبة مجلس الشعب كان هو صاحب الكلمة الأولي والنصيحة الغالية لغالبية الوفود البرلمانية العربية والافريقية والاسلامية والأوروبية سواء في الكواليس أو الاجتماعات العلنية.“

“……ومصر ليست ملكا لفريق دون آخر وليست ملكا لحزب دون آخر ولكنها ملك لجميع المصريين الشرفاء الأمناء الوطنيين.“

واخدين بالكو طبعا من الحتة اللي فاتت…؟

في بقى ف الاخر (تبكيت) لاصحاب النفوس الضعيفة والضمائر اللي ..معرفش مالها اللي بيكدبوا على الناس وبيقولولهم ان مصر بقت هفأ…

انا هكتفي بهذا القدر…بس ياريت فعلا تكونوا قريتوا اللي فوق…..

عشان تعرفوا لو ماكانش في جرايد معارضة ولا برامج talkShow من اللي بتجيب لنا نكد دي…كان زماننا بنحب الحكومة اد ايه…

حتى مع اللي احنا شايفينه..كان زماننا بردو هنحب الحكومة…

واحب اقول ف الاخر..حسبي الله ونعم الوكيل…بس اما اعرف مين اللي دخل الجرنال ده البيت…….

سلام بقى…

في الكلية من 8..

محاضرة الساعة 9 بسم الله ماشاء الله هيا يفترض ساعتين بس الجميع حس انها 6 ساعات

انا من كتر ما فقدت الامل ان المحاضرة تخلص..قعدت ادحك من اليأس..

وراها (رزع) سكشن ومحاضرة تانيين..

ثم الدكتور يخبرنا ان احنا لازم نعمل سيمينار للمشروع…

المشكلة مش في كل ده…

المشكلة اني اروح بيتي اللي هوا ف المنصورة مش سكة سفر يعني…في نص ساعة..من الزحمة

دا طبعا غير التاسكات اللي بدأت و الالجورزمات اللي بقت بتتطلب على غفلة بأكوادها…

النقطة الايجابية هنا ان الدكتور مبسوط من شغلنا ف المشروع..

ربنا يسهل ..ويستر

لأول مرة…انا متفائلة…وعاوزة انام

ملحوظة من بره المنهج…ايه حكاية التي شيرتات الفوشيا مع الولاد ف الجامعة؟!!

لأ فوشيا اللي هوا بمبي فاقع يعني…اللي هوا انا مستحيل البسه..ايه الفكرة من اللون المفزع ده؟!! بقى؟!

مش القضية…سلام.

]]> http://emandarwish.wordpress.com/2009/10/03/untitled/feed/ 5 emanD