السلام عليكم
ازيكو جميعا
الاجازة جت..وقلت هوا دا الوقت المناسب علشان اغير ثيم البلوج
هوا اينعم الثيم الجديد عنوان البلوج فيه صغير و ف جنب زي ما يكون رقم موبايل
بس انا عاجبني الثيم
…
ممكن بقى اطلب منكم حاجة؟
بما ان احنا لسه فيها ومحدش فينا اتهور واتجوز او خلف مثلا
ممكن ان شاء الله اللي ربنا يرزقه بعيل…يبقى يربـيه؟ يا اما ما يجيبوش اصلا؟
معلش انا عارفة اللي بيقرا دلوقتي بيقول(نعم؟) او بيدحك او بيشتم
بس اصل انا اتخنقت بس من دلع العيال الصغيرة
انا بس عاوزة افهم…ليه البنات تفضل مكتئبة لحد ما تتجوز…وبعدين تفضل مكتئبة تاني لغاية ما تجيب عيال؟
والشباب يفضل يشتم ف البطالة واما يلاقي شغل يشتم ف الراتب القليل… واما ربنا يرزقه..امه تتخانق مع ام العروسة على القايمة والجزمة اللي ع العريس والشبكة اللي اخت العريس مستكتراها ع العروسة…الخ
ويوجعوا دماغنا ويحكولنا ف حواديت ليه؟
وهما بعد كل ده اما هيجيبوا عيال…مش هيربوهم؟
ازاي طفل يشتم ابوه و يزعق ف امه؟
الواحد كان زمان اما يطلب حاجة ويتقاله عليها لأ ويزن فيها او يفكر يزعق ويعيط زي العيال المدلعة
كان يسمع الشخطة المحترمة..مع التبريقة المتينة..يكن ويحترم نفسه
العيال دلوقتي لو اتقالها حاجة >>تزعق وتعيط >>اهلها تديها اللي هيا عاوزاه
نوع من ترييح الدماغ بالنسبة للاهل
والطفل عرف السكة خلاص
يعني ايه الولد مش بيعرف يالكل الا من أكل بره؟
اما مايلاقيش غير فاصوليا وهوا هيموت من الجوع …هياكل عادي يعني
يعني ايه طفل عنده 7-8 سنين يشرب كل يوم علبتين و تلاتة بيبسي وامه اللي بتديهاله؟
واما يبقى عنده 15 سنة يجيله سكر ان شاء الله…ويبقى ذنبه ف رقبة مين ده اصلا؟
يعني ايه طفله.. ابوها..ابوها اللي هوا راجل البيت مش عارف يقومها من قدام التلفزيون وسايبها لحد الساعة3 بدل ما تقوم تنام كطفلة طبيعية الساعة 10 بالكتير؟
الاهل دلوقتي مش بيربو عيالهم… بيسيبوهم كده الحياة تعلمهم 
…
ماهيا دي نوعية العيال اللي اما بتكبر وتتجوز
اهلهم بتصرف عليهم بردو وعلى عيالهم بعد كده
لان الواد مش حمل شغل وبهدله
والبت مش حمل عيال وقرف
على فكرة احنا واحنا صغيرين اضربنا واتهزءنا واتزعقلنا بجميع الاشكال
وده شيئ انا فخورة بيه وبحمد ربنا عليه
واهلنا (الاب والام مع بعض) كانوا بياخدو بالهم من تصرفاتنا..وينبهونا ع الغلط
مش تلاقي عيل…داخل على ضيوف ابوه الذين لا تقل اعمارهم عن 45-50 سنة وبيتناقش معاهم
وابوه مبسوط اوي بخفة دم اللي خلفوه وسايبه قاعد عادي يرغي
…
العيال بتاعة دلوقتي دي…كمان 15-20 سنة
هيبقوا جيل مش ههقولكو مفروض يشيل البلد
بس ع الاقل مفروض يشيل نفسه ويشيل اهله اللي تعبو علشانه
فلازم يكون متربي صح…وحاسس ان حد تعب علشانه
علشان كده بكرر رجائي…اللي ان شاء الله ربنا يرزقه بعيال
يبقى أد قراره ده..وأد المسؤولية دي ويربيهم صح
ربنا يوفقنا جميعا
PEACE BA2A 
والله فعلا دى وكسه !! :s
انا فاكرة والله وانا صغيرة اول ماكنت اعمل حاجه غلط كانت هى بس تبريقه من ماما ..بصه واحده ..وتلاقينى مستخبيه فى ركن وافضل اعيط ..دلوقتى لو زعقتى لاى طفل هيضحك بجد وكأنه مش مصدق ان فى لسه حد بيزعق وانك كائن غريب
ولا مثلا لما تكونى خارجه و تبصى تلاقى عيال طول مهما ماشيين يشبطوا فى كل حاجه تقابلهم ..ويحرجوا اهلهم قدام الناس
وهما عارفين انهم كده بيحرجوهم وهينفذوا طلباتهم من غير اى اعتراض لمجرد انهم قدام الناس
باختصار ..العيال دلوقتى للاسف هما اللى بيربوا اهاليهم وبيمشوهم زى مهما عايزين مش العكس
لكن اوعدك ان شاء الله انى لما اخلف هربيهم كويس ومش هاخليهم ولاد فافى ولا بنات اى كلام .. اشوف وشهم بس
ومبرووك عالثيم بقى
بأتفق معاكي من هنا لبعد بكرة
الاطفال المتدلعة بزيادة دي بتخليني عاوزة اقتلهم
واللى يجنن أكتر تلاقى طفل قاعد يعمل جميع انواع الحاجات الغلط من اول رمي وتنطيط وممكن حرق كمان
وأمه قاعدة ولا فى دماغها حاجة
ممكن من حين لآخر تقوله بس يا حبيبي
طبعا لو فى الشارع او مكان عام مبعرفش اعمل حاجة للأسف غير أني أرمي كلمة
لو مامته دي بقي عندنا فى البيت بأزعق للواد وممكن اضربه قدامها
مع أن ماما بتحاول تقنعني ماعملش كده
بس هو يستاهل ولو هي اتكلمت اكيد ردي هيبقي حلو زي تصرفاتها
اللى يجيب عيال لازم يربيهم فعلا
أنا وانا صغيرة كانت مجرد نظرة من ماما باقعد زي الألف والله
كنا عيال متربية فعلا وكمان مدلعة
بس الدلع له حدود وطول ما الحاجة صح ندلع وماله غير كده لأ
فعلا اللى يجيب عيال يا ريت يربيهم يا اما بلاش يجيبهم
موضوع رائع يا إيمان
سلام
ya raye2 2nta ..
tab3n ana ta2rebn mo3zam 2l wa2t bakalemk f 2l mawade3 2l egtema3eya dy ..
w aw3edk isA isA .. 7a5od baly mn 2l so3′yara abl 2l kebera .. w ana 5ol2y day2 asln
بلنسبة للثيم فا هو اختيارك بس حاسس انه محتاج يتظبط شوية .. من الاخر مش مقتنع بيه
هو انا الحمد لله مشوفتش النمازج دى لحد الوقتى .. الحمد لله على تربيتى وهاحاول بقدر الامكان اربى عيالى زى ما ابويا ربانى
انا يااما خدت علق وياما اتهنت واتلطشت بلالم لمجرد انى بقول رائىى فى وجود ناس غريبة
وافتخر
بس النمازج دى فعلاا وكسة هايبان اسرها على المدى البعيد فا ربنا يقدرنا ونعرف نربى ولادنا زى ما اتربينا
والحمد لله
انا بكره ام الاطفال احبهم وهما ابرياء فى سن الخمس سنوات يكبر عن كده اكره اللى جابوه
بالتسبه للتربيه بقى انا بربى دلوقتى ف نورهان بنت اخويا البت ماقولكيش بقى ع الاحترام والهدؤ اللى بيبقى قدامى بريييييييييئه وتحسى كده انها ملاك مافيهاش لؤم ابدااااا
طفله عندها سنتين وبتعرف تتكلم احسن منى ومن ابوها
كله من افلام الانيمشن اللى بفرجها عليها بعد كده هاخليها تتفرج على saw
عشان تبطل لؤم
بس فعلا الطفل اللى مش متربى كويس بيبقى بكبه ع اهله ربنا يحفظنا
هو فى اربع جمل فى النص معرفش مالهم بالبوست بتوع ام العروسه والجزمه . :d
المهم يعنى عجبنى البوست اوى عشان انا بعيش المعاناه ديه دلوقتى
بلا فخر اخويا الصغير -فارس- شقى بتكلم فى كلام اكبر من سنه ومعظم المواصفات اللى حضرتك قلتيها
بس والله ديه ملهاش اى دعوه بالتربيه وانا متاكد من ده
هى الظروف من حوالينا كده
بقيتى صعب تتحكمى فى طفل حياته كلها بقت عل النت والتلفزيون
بيروح المدرسه بيلاقى زيه كتير
مش مشكله فرديه مشكله مجتمع ….والناس الهاديه اللى بتسمع الكلام وبتخاف من البصه والتبريقه هم دل الشواذ
عل عكس زمان
كنا كلنا كده زى ما ميتو قال بنخاف نتكلم ادام حد
من الاخر يعنى عشان متكلمش كتير
صعب انك تخلى ابنك
زى ما احنا كنا زمان ومش عايز ااقول ان كل جيل وليه كميا خاص بيه عشان محسش انى عجزت
بس هو عيال اليومين دول مخهم نضيف اوى ويعتمد عليهم جدا بس عايزين توجيه
وكفايه كده عشان عنيا وجعتنى من السواد ده
طبعا مبرووك اولا على الثيم الجديد
ثانيا الموضوع دا بقى ظاهره وكتر الاستهتار وسوء التربيه
بس في الحقيقه مش سوء تربيه ولكنها دلع زائد
ودا نتيجة ان معظم الاهالي دلوقتي عندهم بالكتير ثلاث اولاد
ولد وبنتين ولدين وبنت كدا يعني وفي اقل من كدا كمان
فبيبقى الاهتمام كبير جدا لدرجة الدلع ودا اللي بيتفهم غلط من ناحية الاولاد
انا مع الاهتمام والتربيه الصح وتلبيطة الرغبات ولكن مش مع الدلع الزائد
واكيد لما حد يغلط لازم يفهم غلطه بالزوق الاول ولو مفهم يبقى بطرق تانيه
موضوع جميل جدا
واسف للاطاله
وسلامي ختامي